هي اليرقة بتتغير و لا بتتطور ؟؟

..

..

للمرة العاشرة بيفوتني نفس الميعاد

.. في يوم الاجازة الوحيد في الاسبوع .. بيفوت لاني باحب انام اخيرا من غير ما اقوم الساعة 7 .. و لا بيفوت لاني مش عاوز اروح .. ولالاني مش عارف انا عاوز اروح و لا لأ ؟؟ .. يمكن .. مش دا عادي في النقلة اللي باعديها .. مش دي سمات المرحلة الانتقالية .. المرحلة الانتقالية !! .. يعني مثلا تخرج من وضع لوضع تاني مختلف تماما .. أو علي الاقل فيه درجة غير تقليدية من الاختلاف بينهم .. و عشان تتحرك لازم تعدي فجوة مجهولة .. فجوة هلامية غير واضحة المعالم و الالوان .. انت عارف ماضيك أيوه .. و عندك تصور للمستقبل .. لكن هيمنجواي قال مرة " يبدأ كل شئ تدريجيا ثم فجأة " .. و انت بتخالف القوانين .. بتعمل قفزة غير تقليدية .. فبتضطر تواجه المجهول .. لانك خرجت عن نمط التوقعات .. بس برده مش القفزات المفاجئة في حياتنا نادرة جدا ؟!! .. او دا راي فرويد عالاقل .. ان التغير جوانا بيحصل ببطء تدريجي غير ملحوظ .. لكن بعد فترة بنعرف و بنشوف بس مش بنستغرب لاننا بنكون اتكيفنا فعلا علي الوضع الجديد .. التغيرات سطحية و الشخصية حتمية .. ماشي يا فرويد .. بس الزرعة بتبدأ بذرة .. و الشجرة بتبدأ نبتة .. و فراشة جميلة طايرة بدايتها يرقة ضعيفة محبوسة .. خلينا نتطور بلاش نتغير .. طب و المرحلة الانتقالية .. آه .. الفجوة بين الظروف مش جوانا .. زي لما ترجع يوم تلاقي مدخل شارعكم اتسد بجدار مهول .. او تلاقي بيتكم وقع فجأة او تلاشي من الوجود .. او تلاقي ابوك اختفي و ما حدش يعرف له طريق .. تغير الظروف المفاجئ بيربك تكتيكاتنا التدريجية و تطورات نمونا اليرقي البطئ .. بيلخبطنا و بيخلينا ناخد وقت عشان نفهم اللي بيحصل .. وعشان نفهم ازاي نواجهه .. و تكون المفاجأة اننا نعرف جوانا حاجات عمرنا ما تصورناها .. و نواجه تحدي جديد .. ازاي نتعامل مع نفسنا الجديدة و بعدين نتعامل مع الظروف الجديدة و بعدين نعدي بالاتنين المرحلة الغامضة العجيبة .. يا تري ليه بيفوتني الميعاد ؟؟

..

.. هو انا مش عاوز .. و لا مش عارف .. بقيت باشتغل اكتر من قبل كده .. و بقيت باحس ان الشغل بياخد وقت ميستحقهوش .. كنت بافكر كتير الاول .. ولما اشتغلت بقيت عاوز افكر .. لا مش عاوز افكر .. انا عاوز اعبر عن اللي بافكر فيه .. ممكن تنزل مظاهرة و تصرخ .. بس : عشان تقدر ترجع تعيش .. و ترجع تشتغل .. حياتنا للاسف شغل مستمر تتخلله صرخات مبتورة مخنوقة .. و صاحبي التقليدي ارتبط ارتباط تقليدي .. و صاحبي المجنون دخل في علاقة مجنونة .. و الاول شايف و راضي بس حاسس ان فيه شئ ناقص .. و التاني مش شايف و لا راضي بس حاسس انه مالك العالم كله .. و قاللي انه مش عارف ازاي ممكن يستني لحد ما يبقوا عواجيز عندهم 28 سنة وانا ضحكت .. و هو اتريق علي البيات السنوي المستمر للوح تلج عمره ربع قرن كامل .. و قلت له : "بس انا مش محتاج اوصل 28 عشان احس اني عجوز .. يبقي انا احسن منك يا عبيط " .. و مش عارف العبيط انا و لا هو صحيح .. و المراحل الانتقالية بالنسبة له مغامرة لذيذة .. اما صاحبي الاول فهو مبيعرفهاش ابدا .. و اللي مضايقني اني لما باصحي من النوم باتضايق اني ما رحتش .. و بالوم نفسي مع اني لو رحت مش عارف اذا كانت هتفرق و لا لأ .. تساؤل عجيب .. تردد غبي و لا تبرير عبيط ده .. هو انت متأكد من ايه اساسا .. ايوه لازم اروح .. و اسيب الاكتشاف لوقته .. ايوه لازم نتحرك .. و نشم الهوا و نحس بالشمس و نغوط في التربة .. و نسيب النتيجة لتفاعلات الكيميا و قوانين الطبيعة .. الحركة هي الحل .. و مش لازم تكون عالم نبات او استاذ كيميا محنك عشان تزرع زرعة .. بلاش غباء .. و لو كنت فاكر التطرف سرطان اتوغل في اعصابنا خلينا نواجهه .. ليه عاوز تسيب الجروح الملتهبة مستورة مخنوقة .. مزهقتش من العفن و الكبت و النسيان .. اكشف نفسك و ارفع كراكيب روحك و فتش يمكن تلاقي حاجة لسه ينفع تستعملها .. او حاجة محتاجة صيانة بسيطة و تشتغل .. او حاجة محتاجة بس تزيل عنها التراب فتبرق من جديد .. لما تخاف خاف .. بس ما تياسش .. لما تخاف فكر في تفسيرات فرويد المشجعة وفي البذور الطيبة اللي بتحب الشمس .. فكر عن الاوقات الصعبة و اللحظات الرهيبة اللي كنا هنضيع فيها و مضعناش .. عارف ليه .. لان احنا موجودين و الظروف بتتغير .. و مهما كانت الفجوات هنتصرف و هنلاقي حل .. لان احنا موجودين .. مهما كان الضباب و اللخبطة و الدربكة هنلاقي بعض و هنتصرف .. لان احنا موجودين .. البيت بيتغير و الشارع بيتغير و حتي الاب بيتغير .. بس احنا موجودين.. و احنا كمان هنتغير .. او هنتطور .. بس هنفضل موجودين

..

لما تخاف خد نفس عميق و غمض عينيك .. و اقعد قدام البحر و اغرق .. مش هيقولك حاجة و لا هيفيدك بحاجة اسالني .. زي آخر كل اسبوع لما باقابله .. و احاول اكلمه و اسمع رايه معرفشي .. مش بيرد ابدا و لا عنده حل ابدا .. بالقي نفسي ساكت متاخد مسلم له .. و هو بيغرقني .. و بيغسلني .. و بينضفني .. و هو بيمتصني و يحتويني .. بيسرقني .. ما تنتظرش منه حلول .. و لا تحاول تلاقيله قانون .. و لا تحاول تفهم قوانين الكيميا و معادلات الطبيعة .. اتحرك و اروي و بص للشمس .. هتلاقي القوانين جواك محفورة .. هتحس بالكيميا في روحك و هتشوف الفيزيا جواك .. مش لازم تهد الدنيا و تبنيها في مراحل الضباب الهلامية .. بس اللي لازم تعمله ضروري انك تقوم الساعة 7 الاسبوع الجاي .. و تروح ميعادك .. و تكشف سر جديد .. و تعرف بقيت مين بعده ..

لازم تروح

.. لازم

.. لازم

.. لااااااااااازم