فيه حد مات ؟؟

هي التفاصيل مهمة ؟

.. و لا حشو بنملي بيه الاوقات عشان نفسر حياتنا .. عشان متكونش مملة جدا .. لو جردناها للافكار الكبيرة المكلكعة ؟
.. ما انت بتغسل وشك و تسرح تسريحتك و تغير هدومك .. و تخطف سندويتش مع مشروب دافي مركز .. و تنزل جري .. و تلف عشان الشجرة اللي قدام الباب .. و تبتسم لجار و تكشر لواحد تاني و تمشي شوية و تركب شوية .. و تسمع تعليقات و خناقات و روايات .. وترد و تعتذر و تصرخ و تسكت .. و تطلع سلالم و تعدي ابواب .. و تشاور لعامل أمن و تنادي علي عامل اسانسير و تفتح باب و تقعد ورا مكتب و تتكلم في تليفون و تفتح جهاز كومبيوتر و تملا ورق .. و ... و كتير .. كتير .. بس دا كله ليه .. كل دا ليه .. ؟؟ .. ايه قيمة الخطوط بره اللوحة الكبيرة .. ايوه محتاج عشرات التفاصيل عشان تعيش يومك .. ما انت متقدرش تعيش الفكرة الكبيرة طول الوقت .. لكن من غير افكار كبيرة .. الخطوط هتكبر و هتكبر و هتكبر .. هتصبح متاهات عشوائية مشوهة .. و معني اللوحة هيضيع قدام الخطوط القبيحة الفاسدة .. التفاصيل السخيفة .. حبيت و انجرحت ؟ .. طب مهم كلام الوداع كان ايه .. خايف .. لما عديت الطريق لوحدك مرة .. ايه اللي حصل .. قلقان .. لما ادمنت القراية علي نور الاباجورة قبل النوم .. استريحت ؟؟ .. ناجح .. طب ايه يعني اتاخرت عن ميعاد امبارح .. مقهور .. طب مهم انك مقدرتش تصرخ قبل ما تموت .. طب لو مت .. مهم كان آخر أحلامك ايه .. و لو اتقتلت .. مهم في آخر صلواتك قلت ايه .. لو اتقلت من غير ذنب .. مهم كنت مؤمن و لا منتظر الهام ؟؟ .. التفاصيل بتكبر و تتوحش .. و تحاصرنا .. بتخنقنا .. لان الافكار الكبيرة بتموت